Vuolgge mielde čalmmustahttit čáppa Barentsguovllu erenoamáš nuoraid –sáhtát vuoitit 10 000 kruvnnu!
Duogáš
Odne almmuhat Discover Barents govvengilvvu, ja buohkat geat liikojit govvet bovdejuvvojit searvat! Govvengilvvus lea Barentsguovlu guovddážis, ja vuosttas gii čađahii dákkár gilvvu lei Kainuu fylka (Suomas) jagi 2017, mas dalle lei ovdagoddedoaibma Barents Regiovdnaráđis.(https://www.barentscooperation.org/en/About/Learn-More/Barents-region).
Gilvvu váldoulbmil lea ovddidit ja nannet rádjarasttildeaddji ovttasbarggu Barentsguovllus. Muđui lea ulbmil ovttas ovddidit Barentsguovllu ja čalmmustahttit dan buorebut. Vuosttaš govvengilvvu fáddá lei luondu, ja gilvu lihkostuvai hirbmat bures.
Discover Barents Govvengilvu 2019 – Barents Nuorat
Finnmárkku fylkkas, mas lea ovdagoddedoaibma Barents Regiovdnaráđis dán áigodagas (2017-2019), lea áigumuš joatkit gilvvu 2019:s, ja sávašii ahte regiovdna mas lea ovdagoddedoaibma lágida gilvvuid juohke nuppi jagi. Govvengilvvu 2019 fáddá lea Barentsguovllu Nuorat.
Buohkat geat háliidit sáhttet gilvui searvat. Don dieđihat iežat gilvui go sáddet govaid maid leat govven Barentsguovllus ja mas nuorat leat fáddán. Mii fuomášahttit ahte olbmot geat leat govvejuvvon galget mieđihit dasa ahte govaid sáhttá almmuhit ja ahte dat sáddejuvvojit govvengilvui. Gilvvu bokte háliidat čohkket govaid main lea buorre kvalitehta ja mat čájehit Barentsguovllu nuoraid árgabeaivvi, muhto daiguin galgá maid sáhttit čalmmustahttit min erenoamáš čáppa guovllu.
Govvengilvu bistá olles cuoŋománu Govvengilvu lea áigodagas guovvamánu 1.2. – cuoŋománu 30.4. 2019, ja riikkaidgaskasaš jury vállje vuitiid miessemánu 2019 mielde. Gilvvu vuoiti almmuhuvvo geassemánu 1. 6. 2019. Gilvobohtosat almmuhuvvojit www.discoverbarents.com ja www.barentscooperation.org. neahttasiidduin geassemánu 1.6. 2019. Buohkat geat vuitet ožžot dieđu, ja mii eaktudat ahte rivttes oktavuođadieđut leat midjiide sáddejuvvon.
Vuoittut juogaduvvojit čuovvovaččat:
I vuoitu: 1.000 Euro
II vuoitu: 750 Euro
III vuoitu: 500 Euro
Lassin golmma buoremus govvii maid jury vállje, besset olbmot neahttasiiddus www.discoverbarents.com jienastit gova masa eanemusat liikojit, ja govva mii oažžu eanemus jienaid vuoitá, ja sutnje mieđihuvvo sierra árvonamma. Jienasteapmi loahpahuvvo seamma áiggi go govvengilvu; cuoŋománu 30.4. 2019. Govvengilvu čalmmustahttojuvvo sosiála mediain, fáddágilkoriiguin #discoverbarents ja #barentsyouth bokte.
Son gii vuoitá govvengilvvu vuosttaš vuoittu bovdejuvvo erenoamáš meanuide Barents Regiovdnaráđi čoahkkima oktavuođas mii lágiduvvo golggotmánu 1.10. – 4.10. 2019, Upmejes (Västerbotten, Ruoŧas). Finnmárkku fylkkagielda máksá vuoiti mátkegoluid meanuid oktavuođas.
Oktavuođaolmmoš jos dárbbašat eanet dieđuid
Natalia Karlsen, Finnmárkku fylkkagielda, +47 46648280, natalia.karlsen@ffk.no